Consorcio
O consorcio d’o prochecto Linguatec-IA ye formau per las siguients entidaz:
ELHUYAR
ELHUYAR. Chefe de filas d’o prochecto. Ye o beneficiario prencipal d’o prochecto LINGUATEC-IA, ocupando-se, entre atros, d’a chestión administrativa-financiera y a coordinación cheneral d’o prochecto.
ELHUYAR tiene por obcheto y fin fundacional empentar, promover y desarrollar a ciencia y l’euskera. En l’ambito d’as tecnolochías d’a luenga y a intelichencia artificial, as arias d’investigación que desarrolla en o suyo centro d’intelichencia artificial Orai incluyen a tradución automatica, a creación automatica de recursos lingüisticos, a minería de texto y as tecnolochías d’a fabla. Asinasmesmo, ELHUYAR tiene una larga experiencia de liderazgo y participación en prochectos europeus de tecnolochías d’a luenga. Ye miembro d’o Ret Basco de Ciencia y Tecnolochía.
LO CONGRÈS PERMANENT DE LA LENGA OCCITANA
LO CONGRÈS PERMANENT DE LA LENGA OCCITANA ye, de conchunta con Elhuyar, a organización impulsora d’a idea y responsable d’a coordinación d’o prochecto. LO CONGRÈS ye l’organismo regulador interrechional d’a luenga occitana. O suyo obchetivo ye contribuyir a la vitalidat y o desembolique de l’occitano treballando ta reforzar a suya conoixencia y codificación por medio d’a producción de ferramientas en os distintos aspectos d’a luenga (lexicografía, lexicolochía, terminolochía, neolochía, fonolochía, ortografía, gramatica y toponimia).
HITZ
UNIVERSIDAT D’O PAÍS BASCO / EUSKAL HERRIKO UNIBERTSITATEA (UPV/EHU). A UPV/EHU ye representada por o centro HiTZ. HiTZ ye un centro de referencia en Tecnolochías d’o parlache. O suyo obchetivo ye promover a investigación, a formación, a transferencia tecnolochica y a innovación en Intelichencia Artificial centrada en o parlache y a fabla. Ye un centro multidisciplinar compuesto por más de uitanta personas con formación en informatica, lingüistica, humanidaz dichitals y incheniería. O centro ye formau por os grupos d’investigación Ixa y Aholab. En l’actividat d’o grupo se presta especial atención a l’euskera y a las luengas con pocos recursos.
UNIVERSITÉ TOULOUSE JEAN JAURÈS
UNIVERSIDAT TOULOUSE-JEAN JAURÈS. A Universidat Toulouse-Jean Jaurès ye un centro prencipal d’a investigación sobre a luenga occitana y a suya ensenyanza.
En l’ambito d’o prochecto LINGUATEC-IA, os investigadors d’o grupo OCRE (“Occitano, Luengas Romances, luengas d’Europa: describir, formalizar, equipar, comparar”) d’o laboratorio CLLE aportarán as suyas competencias en lingüistica occitana y en construción de recursos ta lo tratamiento automatico de l’occitano.
UNIVERSITÉ PERPIGNAN VIA DOMITIA
UNIVERSIDAT DE PERPINYÁN VIA DOMITIA. A Universidat de Perpinyán Via Domitia ye representada por LAMPS (Laboratoire de Modélisation Pluridisciplinaire et Simulations); una unidat d’investigación multidisciplinar centrada en a modelización y a simulación dichital, tanto teorica como aplicada, con competencias en determinaus ambitos d’a informatica, as matematicas y a fisica. En o prochecto Linguatec-IA l’equipo de LAMPS levará a cabo actividat d’investigación y desembolique arredol d’o tratamiento automatico d’o parlache ta las luengas minoritarias, y o catalán en particular.
IKER – CNRS
IKER. O Centro d’Investigación de Luenga y Testos Bascos IKER ye una unidat mixta d’investigación (UMR5478), cuals organismos de tutela son o Centre National d’a Recherche Scientifique (CNRS), a Université Bordeaux Montaigne (UBM) y a Université de Pau et des Pays de l’Adour (UPPA). IKER tiene a suya seu en Bayona, en o campus d’a Nive, y ye l’unico centro d’investigación especializau en estudios bascos en Francia.
En o marco d’o prochecto LINGUATEC-IA, aportará as suyas conoixencias en lingüistica basca y en o tratamiento automatico d’as luengas. Iste centro d’investigación conta con una amplia experiencia en a cheneración de recursos ta l’euskera.
UNIVERSITAT DE LLEIDA
UNIVERSITAT DE LLEIDA. A Universitat de Lleida (UdL) ye a universidat de referencia en o territorio catalán occidental, incluyindo buena parte d’os Pireneus orientals y, dentro d’istos, o territorio occitán aranés.
Dentro d’a UdL, o Departamento de Filolochía y Comunicación aculle os estudios dedicaus a comunicación audiovisual y a las filolochías catalana y espanyola. Parte de l’autividat d’investigación d’iste trestallo se desarrolla en o grupo TRAMA (Grup de Recerca en Transformacions dels Mitjans de Comunicació) y, dentro d’iste, o grupo SoGeL (Grup de Recerca en Sociolingüística i Geolingüística). SoGeL ye dedicau a la investigación sobre a variación cheografica d’a luenga y as suyas dinamicas socials, sobretot as que van ligadas a las fronteras politicas. A suya fayena se centra preferenment en o catalán y l’occitano.
GOBIERNO DE ARAGÓN
A Direción Cheneral de Patrimonio Cultural d’o Gubierno d’Aragón, participa por primera vez, en un prochecto europeu en materia lingüistica, incorporando l’aragonés en o desenrollo y implantación de tecnolochías d’a luenga.
En ista nueva etapa se van a implementar y millorar as ferramientas creadas en l’anterior prochecto LINGUATEC, que tenió como socio d’Gubierno d’Aragón, a la Direción Cheneral de Politica Lingüistica.
