Linguatec-IA aduya a eliminar as baranas lingüisticas d’a zona d’os Pireneus

A coordinadora d’o proyecto Itziar Cortés Etxabe (Elhuyar) esponió cualques claus d’o proyecto Linguatec-IA en lo I Congreso Internacional sobre Comunicación, Tecnolochía y Luengas Minoritarias organizau en Vielha (Val d’Arán), o pasau 27 de noviembre. O congreso estió organizau por o Conselh Generau d’Aran, RTVE, a Universidat Pompeu Fabra y a Universidat de Lleida.

Cortés prenió parte, de conchunta con Benaset Dazéas (Lo Congrès permanent d’a lenga occitán) entre atros, en un charrada sobre proyectos d’innovación en tecnolochías de luengas minoritarias y IA. A coordinadora d’o proyecto fació un repaso historico y recordó que, igual que en o proyecto antecesor Linguatec, “continamos treballando con un mesmo obchetivo: contribuyir a eliminar as baranas lingüisticas d’a zona d’os Pireneus, emplegando tecnolochías d’a luenga (tanto a libel d’investigación como a libel d’aplicacions)”.

A representant d’Elhuyar dio a conoixer cualques d’os resultaus que s’asperan de Linguatec-IA: “Por un costau, s’aspera aumentar en recursos lingüisticos basicos, tals como treballos de documentación, creyación de bases de datos y corpus; por unatro costau, se continará treballando en l’aria d’as tecnolochías d’a luenga, desarrollando traductors automaticos y atras tecnolochías base que s’emplegarán en una plataforma final de doplache automatico entre as luengas d’os Pireneus”. Amás, tamién se ye investigando “en a creyación de LLMs ta luengas de no guaires recursos; una abanza important frent a las tecnolochías ya disponibles en os idiomas mayoritarios”, adhibió.

Os participants en o coloquio metioron de manifiesto as dificultaz que se troban as luengas con pocos recursos a la hora d’afrontar diferens retos tecnolochicos, como, por eixemplo, no disponer de guaires datos en comparanza con as luengas de mayor grandaria, u que os models de parlache son ateseraus ta las luengas hegemonicas. Asinasmesmo, os participants remarcoron a necesidat de contar con estratechias propias en o desembolique d’as nuevas tecnolochías.”