O proyecto Linguatec-IA ya ye dando os suyos primers resultaus

En a reunión de consorcio celebrada en a Universidat de Toulouse Jean Jaurès o día 6 de noviembre s’han puisto veyer os primers resultaus d’o proyecto Linguatec-IA. Dimpués de repasar as acions relacionadas con l’alministración y coordinación d’o proyecto y revisar os aspectos comunicativos d’o mesmo, diferens miembros d’o consorcio esplicoron y amostroron l’abanza d’as actividaz más productivas.

En a reunión se fació fincapiet en dos d’os resultaus más asperaus d’iste proyecto. Un d’os aspectos que se fan notar ye a investigación de models de parlache grans (LLMs, Large Lenguage Models) ta luengas minoritarias. En ixe sentiu, s’amostró l’abanza d’a investigación, explicando as tecnicas cientificas que se son fendo ta ixa fin. A priori, y a falta de fer una avaluación exhaustiva, os resultaus obtenius dica o momento han estau avaluaus como favorables por o consorcio.

Unatro d’os aspectos más importans d’o proyeto Linguatec-IA ye desarrollar una plataforma multilingüe ta lo subtitulau y doplache de conteniu audiovisual. A plataforma achunta totas as tecnolochías de voz y de traducción automatica que se son creyando y millorando en o proyecto, y da piet a poder creyar contenius multilingües entre as luengas d’o proyecto muit facilment. En a reunión s’amostró cómo creyar subtitols multilingües ta un conteniu audiovisual.