A farga numerica ya ye en linia!
O chueves 10 d’octubre, en o marco d’as reunions d’o proyeuto Linguatec IA zelebradas en Pau, s’inauguró ofizialmén La Farga numerica, a portalada dedicada a las tecnolochías lingüisticas ta l’ozitano creau por Le Congrès.
La Farga numerica ye una plataforma colaborativa d’azeso, promozión, intercambio y desembolique de recursos y ferramientas de PAL (prozesamiento automatico d’o parlache) y informaticas ta la luenga oczitana. A suya creyazión responde a las nezesidaz identificadas tanto por a comunidat como os desembolicadors: tener azeso a datos cualificaus, fer un seguimiento compartiu, coordinar o treballo y compartir os desemboliques.
La Farga numerica ye inspirada en os espazios de mesa en común y colaborazión d’a comunidat d’o software libre (distribuzions Linux, suites de software, etc.) y aspira a estar un puesto de trobada de diferens iniziativas. Grazias a la suya interfaz escalable, ofrexe tota una serie de recursos y funzions ta desembolicadors y ta qui quieran fer contribuzions: un inventario cualificau y autualizau de recursos, una fuella de rota dichital, estandard informaticos adaptaus a l’oczitano, datos de contauto d’os distintos actors y proyeutos estructurals, convocatorias de proyeutos, convocatorias ta realizar contribuzions, mensachería instantania, publicazions zientificas y vichilanzia tecnolochica.
O suyo obchetivo ye unir a la comunidat formada tanto por personas profesionals como voluntarias que treballan ta creyar os recursos y construyir as ferramientas que aconforman o paisache dichital oczitano. La Farga numerica les ofrexe un entorno do pueden realizar intercambios, estar a lo día d’os zagueros abanzes en a materia y zentralizar a informazión. D’iste modo, podrán trobar en un mesmo espazio tot lo nezesario ta seguir dotando a la luenga d’as tecnolochías que ameneste.
La Farga numerica ye o resultau d’o proyeuto Linguatec-IA desarrollau ta crear conoixenzia en intelichenzia artifizial ta la dichitalizazión de l’aragonés, o catalán, l’euskera y l’oczitano.
Share on Facebook Share on Twitter Share on Pinterest