Culminamos con esito o Congreso Transfronterizo sobre luengas minorizadas y intelichencia artificial

O Congreso Transfronterizo Luengas minorizadas y intelichencia artificial. Mirando a lo futuro dende os dos costaus d’os Pireneus organizau per Linguatec-IA en Baiona, en o marco d’os Cursos de Verano Transfronterizos (UNUM), ha contau con un nutriu grupo de ponents que han dau a conoixer as necesidaz y a realidat que viven as luengas d’os Pireneus en a era d’a IA generativa.

Dimpués de fer una breu presentación d’a chornada, Amaia Armendáriz Lasso, chestora en Comunidat de Treballo d’os Pireneus (Interreg POCTEFA), ha meso de manifiesto en a suya intervención a importancia d’a colaboración d’entidaz d’os dos costaus d’os Pireneus.

Os asistens han puesto desfrutar de senglas conferencias impartidas per Quim Barnola, coordinador de luengas oficials y minoritarias de RTVE, y Lionel Buannic, director de ÒC-tele y de Brezhoweb, que han exponiu cadagún dende o suyo punto de vista os retos a que s’enfrontinan as luengas minorizadas en os meyos televisivos y as oportunidaz que les ofreixe actualment a IA.

Contino, Itziar Cortés, coordinadora d’o proyecto Linguatec-IA y representant d’Elhuyar, ha presentau as posibilidaz que ofreixe a plataforma de doplache automatico desarrollau en o proyecto. Ye previsto ir millorando as tecnolochías que subyacen en ista demo en función d’os abances que s’apercacen en cada luenga.

A’l detrás d’una breu pausa, miembros d’o consorcio de Linguatec-IA han dau a conoixer os itinerarios previstos ta las luengas con as cualas treballan: o punto de partida de cadaguna d’ellas, o punto en o cual se troban actualment y as previsions a futuro. As conferencias sobre l’occitán han estau impartidas per Aure Séguier (Lo Congres) y Myriam Bras (Universitè Tolouse – Jean Jaures); Helena Torres-Purroy (Universitat de Lleida) ha feto parla sobre l’aranés, y Aitzol Astigarraga (Orai NLP Teknologiak – Elhuyar) sobre l’euskera.

A’l tarde, Urtzi Etxeberria (IKER-CNRS) y Benaset Dazéas (Lo Congres) han amoderau una mesa retuna con representants politicos de Nueva Aquitania y Navarra: Mathieu Bergé (representant d’a rechión de Nueva Aquitania) y Javier Arakama (director cherent d’Euskarabidea- Instituto Navarro de l’Euskera). A chornada ha culminau con un acto d’actualización y siña d’o Manifiesto d’o Ret d’Eszelencia Transfronteriza en Intelichencia Artificial orientada a lo Parlache per parte d’o consorzio d’o proyeuto Linguatec-IA.