Lo congrès transfronterèr « Lengas minoritàrias e intelligéncia artificiau » que s’ei acabat dab escaduda

Lo congrès transfronterèr  Lengas minoritàrias e intelligéncia artificiau. Un espiar sus l’aviéner deus dus costats deus Pirenèus enlà organizat per Linguatec-IA a Baiona en l’encastre deus Cors d’estiu transfronterèrs (UNUM) qu’amassè un grop gran de conferencièrs qui expausèn los besonhs e la realitat qui viven las lengas deus Pirenèus a l’èra de l’IA generativa.

Après aver lèu presentat la jornada, Amaia Armendáriz Lasso, gestionària de la Comunautat de tribalh deus Pirenèus (Interreg POCTEFA) que soslinhè dens la soa intervencion l’importància de la collaboracion deus organismes deus dus costats deus Pirenèus.

Los participants qu’assistín a las conferéncias balhadas per Quim Barnola, coordinator de las lengas oficiaus e minoritàrias de RTVE d’ua part e per Lionel Buannic, director d’ÒCtele e de Brezhoweb d’auta part ; tots dus qu’expausèn lo lor punt de vista tà çò deus desfís qui deven relhevar las lengas minoritàrias dens los mèdias televisuaus atau com las oportunitats qui’us auhereish actuaument l’IA.

Itziar Cortés, coordinatora deu projècte Linguatec-IA e representanta d’Elhuyar que presentè apuish las possibilitats auhèrtas per la platafòrma de doblatge automatic desvolopada en l’encastre deu projècte. Qu’ei previst de melhorar chic a chic las tecnologias presentadas en aquera demostracion en foncion deus progrès obtienuts en cada lenga.

Après ua pausòta, membres deu consòrci de Linguatec-IA que hesón conéisher los itineraris prevists entà las lengas dab las quaus tribalhan : lo punt de partença de cadua d’enter eras, lo punt on se tròban actuaument e las previsions entà l’aviéner. Las conferéncias sus l’occitan qu’estón asseguradas per Aure Séguier (Lo Congrès) e Myriam Bras (Université Tolouse – Jean Jaures) ; Helena Torres-Purroy (Universitat de Lhèida) que parlè de l’aranés, e Aitzol Astigarraga (Orai NLP Teknologiak – Elhuyar) deu basco.

Lo vrèspe Urtzi Etxeberria (IKER-CNRS) e Benaset Dazéas (Lo Congrès) que moderèn ua taula redona compausada de representants politics de Navèra Aquitània e de Navarra : Mathieu Bergé (representant de la Region Navèra Aquitània) e Javier Arakama (director gerint d’Euskarabidea- Institut navarrés deu basco). La jornada que s’acabè per ua ceremonia d’actualizacion e de signatura deu manifèste deu Hialat d’excelléncia transfronterèr en intelligéncia artificiau orientada sus la lenga peu consòrci deu projècte Linguatec-IA.