Melhorament de la basa tecnologica entau basco e lo transferiment tà l’occitan

Pendent aquera darrèra annada deu projècte LINGUATEC-IA, tots los desvolopaments que foncionan a hum de calhau, dont los qui pertòcan au basco.

Tà çò deu basco, « que poirem distinguir dus tipes d’òbras – c’explica Aitzol Astigarraga, coordinator d’Orai NLP (Elhuyar)-. Qu’avem de l’ua part melhorat la basa tecnologica entà la transcripcion e la sintèsi vocau e, tà çò de la transcripcion, qu’avem includit ua terminologia especiau entà facilitar la reconeishença de noms pròpis, de toponimes, etc. Tà çò de la sintèsi vocau, qu’avem tribalhat sus las votz quan exprimen emocions ».

L’objectiu qu’ei bitara d’acabar aqueras òbras, purmèr entau basco e « a partir d’aquí, transferir aquera tecnologia cap ad autas lengas », c’explica Astigarraga . Lo cercaire qu’indica que de l’aute part, las equipas que son a tribalhar sus ua auta tasca mei ligada a la recèrca : « En collaboracion dab lo Centre HiTZ de l’EHU, qu’avem aplicat a l’occitan duas metodologias de desvolopament de LLM en basco, e qu’avaloram actuaument los resultats d’aqueths par de metòdes. Lo sistèma qui hornirà lo resultat mei bon que’ns permeterà de realizar ua demostracion ». Lo transferiment cap a l’occitan deu tribalh de recèrca realizat dens aqueth maine entau basco que constituïrà en consequéncia ua contribucion màger.