Linguatec-IA que desvolòpa atrunas tecnologicas de la lenga e de la paraula entà l’aranés

L’Universitat de Lhèida que contribueish au projècte Linguatec-IA en desvolopant apèrs tecnologics de la lenga e de la paraula entà la varietat aranesa de l’occitan.

« Qu’èm concrètament a desvolopar còrpus escriuts e oraus qui alimentaràn apèrs tecnologics taus com lo sintetizader vocau, lo sistèma de reconeishença vocau, deus traductors automatics entà poder fin finau obtiéner aplicacions d’usatge quotidian, com lo sostitolatge automatic de videos, lo doblatge automatic de produccions audiovisuaus, enter autas aplicacions », c’explica Helena Torres Purroy, de l’Universitat de Lhèida.

Lo projècte que’s tròba actuaument en fasa d’alimentacion deus còrpus. Ua quantitat grana de dadas que hè besonh entà alimentar aqueras tecnologias qui demandan volumes de dadas deus bèths. « Que contunham a recuélher còrpus, tèxtes escriuts, tèxtes oraus e qu’èm a melhorar pro largament un traductor qui existeish dejà : lo traductor Apertium. Que’u revisam e que l’alimentam dab un lexic navèth, dab navèras listas de noms pròpis, de toponimes, etc., en  corregí’u e en etiquetar totas las entradas », ce horneish Torres Purroy.

D’un aute costat, « qu’èm a numerizar lo diccionari de Frederic Vergés publicat en 2022. Qu’ei lo mei gran diccionari qui existeish entà totas las variacions de l’occitan. Quan la soa numerizacion sia acabada, que’u barrejaram tanben dens lo traductor Apertium », ç’a hornit.