Platafòrma de sostitolatge enter las lengas deus Pirenèus
Dens l’encastre deu desvolopament d’aplicacions qui favorizan l’utilizacion de las lengas e la lor interoperabilitat, l’un deus objectius màgers de Linguatec-IA qu’ei de crear ua platafòrma de doblatge automatic enter las lengas deus Pirenèus. L’objectiu d’aqueth èish de tribalh qu’ei que las videos realizadas en l’ua de las lengas deu territòri Poctefa e poscan estar accessiblas en las autas lengas.
La prumèra fasa d’aqueth èish de tribalh que s’ei acabada dab escaduda dab la presentacion d’un prototipe aus partenaris : que s’ageish deu desvolopament d’ua platafòrma de sostitolatge qui fonciona enter l’aragonés, lo catalan, lo basco, l’espanhòu, lo francés e l’occitan. Aquera platafòrma qu’utiliza purmèr las tecnologias de reconeishença vocau creadas dens l’encastre deu projècte Linguatec-IA, qui transforma la votz en tèxte, puish qu’aplica la traduccion automatica. Qu’utilizam concrètament las tecnologias de Traduze (traductor espanhòu – aragonés), Revirada (traductor francés – occitan) e Elia (traductor basco e diferentas lengas), creadas per mantun deus organismes qui son partidas beneficiàrias deu consòrci de Linguatec-IA.
Com ac amuisha la video, lo prototipe que perpausa dejà un sarròt de foncions qui permeten de crear ad aise videos dab sostítols en mantua lenga.
