Prumèrs resultats deu projècte Linguatec-IA

Los prumèrs resultats deu projècte Linguatec-IA qu’estón presentats au parat de la reünion deu consòrci organizada a l’Universitat Joan Jaurés de Tolosa lo 6 de noveme darrèr. Un còp passat en revista las accions miadas tà çò de l’administracion, la coordinacion deu projècte e las accions de comunicacion, mei d’un membre deu consòrci qu’expliquèn e presentèn l’avançament de las activitats mei productivas.

L’atencion deus participants que’s portè sustot sus dus deus resultats mei esperats deu projècte. Lo prumèr que pertòca la recèrca de grans modèles de lengatge (LLMs, Larg Lenguage Models) entà las lengas minoritàrias. Los progrès de la recèrca en aqueth sens qu’estón expausats, acompanhats d’un explic de las tecnicas scientificas actuaument aplicadas en aquera mira. A priori, e en l’espèra d’ua avaloracion exaustiva, los resultats obtienuts dinc ací qu’estón jutjats favorablament peu consòrci.

Un aute deus aspèctes màgers deu projècte Linguatec-IA que concerneish lo desvolopament d’ua platafòrma multilingua destinada au sostitolatge e au doblatge de contienuts audiovisuaus. La platafòrma qu’amassa totas las tecnologias vocaus e de traduccion automatica qui’s desvolòpan e qui’s melhoran actuaument dens lo projècte, e que poderé contribuir a crear plan aisidament contienuts multilingües enter las lengas deu projècte. Los participants a la reünion que podón assistir a ua demostracion de creacion de sostítols en mantua lenga per un contienut audiovisuau.