Ua collaboracion qui da los sons purmèrs resultats
L’objectiu deu projècte Linguatec-IA qu’ei de facilitar la comunicacion multilingua enter los locutors qui parlan las lengas de las diferentas regions deus Pirenèus. Las lengas dab las quaus tribalham que son l’euskara, lo catalan, l’aragonés e l’occitan (dens las soas diferentas variantas pirenencas : lo gascon, lo lengadocian e l’aranés). Dens l’encastre d’aqueth projècte, que desiram encoratjar lo desvolopament de sistèmas e de projèctes de recèrca tà çò de l’intelligéncia artificiau, qui favorizaràn lo desvolopament d’aqueras lengas deus Pirenèus.
La collaboracion deus diferents organismes qui son partidas beneficiàrias deu projècte Linguatec-IA que permet de balhar ua aviada grana ad aqueras lengas qui n’an pas que chic de ressorsas e qui son minorizadas dens aqueras regions. Aquera collaboracion qu’ei indispensabla entà partatjar experiéncias e desvolopar solucions ad hoc entà cadua de las lengas. Las recèrcas e los desvolopaments realizats dens lo projècte que parten de las realitats de cadua de las lengas. Aquí qu’ei un aspècte fondamentau d’aqueth projècte.
Lo projècte Linguatec-IA que comencè en genèr de 2024 e los purmèrs resultats que començan d’aparéisher d’ara enlà. Itziar Cortés, representanta d’Elhuyar e coordinatora deu projècte que declara ad aqueth perpaus : « Que tribalham de l’ua part au desvolopament d’un modèle de lengatge entà l’occitan e los purmèrs resultats que hèn lampet. Que progressam d’auta part dens la construccion d’ua platafòrma dens la quau e seràn integrats tots los apèrs desvolopats dens l’encastre deu projècte Linguatec-IA ». Un aute deus objectius ultimes deu projècte qu’ei basat sus la creacion d’ua platafòrma de doblatge automatic enter las lengas minorizadas deus Pirenèus. Itziar Cortés qu’afirma qu’en aqueth èish de tribalh « qu’avem dejà los purmèrs resultats. Qu’èm en ua fasa de demostracion d’ua platafòrma de sostitolatge automatic enter las lengas minorizadas deus Pirenèus ».
Linguatec-IA qu’ei dejà lo dusau projècte de collaboracion qui tira tau desvolopament de las lengas minorizadas deus Pirenèus e qui s’avera estar un projècte clau entau desvolopament d’uas d’aqueras.
