Linguatec-IA que contribueish a lhevar las barrèras lingüisticas de la region deus Pirenèus

La coordinatora deu projècte Itziar Cortés Etxabe (Elhuyar) que presentè daubuns deus punts fondamentaus deu projècte Linguatec-IA pendent lo Ièr Congrès Internacionau sus la Comunicacion, la Tecnologia e las Lengas Minoritàrias organizat a Vielha (Vath d’Aran) lo 27 de noveme passat. Lo congrès qu’estó organizat peu Conselh Generau d’Aran, RTVE, l’Universitat Pompeu Fabra e l’Universitat de Lhèida.

Itziar Cortés que participè dab Benaset Dazéas (Lo Congrès permanent de la lenga occitana) enter autes, a un collòqui suus projèctes d’innovacion dens lo maine de las tecnologias de las lengas minoritàrias e l’IA. La coordinatora deu projècte que prepausè un resumit deus antecedents istorics e que tornè brembar que, segon l’exemple deu projècte precedent Linguatec, « que contunham a tribalhar dab un medish objectiu : contribuir a lhevar las barrèras lingüisticas de la region deus Pirenèus en utilizant las tecnologias de la lenga (au nivèu de la recèrca e au nivèu de las aplicacions) ».

La representanta d’Elhuyar que presentè quauques uns deus resultats esperats deu projècte Linguatec-IA : qu’esperam d’ua part acréisher lo nombre de ressorsas lingüisticas de basa taus com las òbras de documentacion, la creacion de basas de dadas e lo còrpus ; que contunharam d’un aute costat a tribalhar dens lo maine de las tecnologias de la lenga en desvolopant traductors automatics e autas tecnologias de basa qui seràn utilizadas sus ua platafòrma finau de doblatge automatic enter las lengas deus Pirenèus ». Un tribalh de recèrca qu’ei d’un aute costat en cors entà « crear LLM entà las lengas dab de febles mejans ; un progrès important de cap a las tecnologias dejà disponiblas entà las lengas majoritàrias », ce horní.

Las personas participant ad aqueth collòqui que tienón a soslinhar las dificultats a las quaus deven afrontar las lengas dab drin de mejans entà relhevar los diferents desfís tecnologics, com, per exemple, la disposicion d’ua quantitat de dadas mendra cap a las lengas mei granas, o lo hèit que los modèles de lengatge e son concebuts entà las lengas egemonicas. Los participants qu’an d’un aute costat insistit suu hèit que hè besonh de dispausar de las nostas pròpias estrategias entà desvolopar las tecnologias navèras.